Spurt og svarað

Fyrir hvern er Boot Camp?
Boot Camp hentar öllum þeim sem eru tilbúnir að leggja sig fram til að koma sér í gott form. Boot Camp er ekki háð aldri, kyni eða formi svo lengi sem rétt hugarfar, sterkur vilji og metnaður til að ná árangri er til staðar. Ef þú vilt koma þér í gott form og ert tilbúinn að taka á því þá hentar Boot Camp þér.

Þarf ég ekki að vera í góðu formi til að byrja?
Nei, engan veginn. Boot Camp hentar öllum burtséð frá formi. Ætlast er til að hver einstaklingur geri það sem hann getur og er hvattur áfram af þjálfurum og æfingafélögum sínum til að fá sem mest úr hverri æfingu. Þó að Boot Camp æfingarnar henti hverjum sem er sem er reiðubúinn að leggja sig fram eru einnig Elite æfingar fyrir þá sem hafa náð lengst og Grænjaxlatímar fyrir þá sem vilja koma sér rólega af stað. Það geta því allir fundið sína leið hjá Boot Camp og þú getur treyst því að fá eins mikið úr hverjum tíma og mögulegt er.

Hvernig eru æfingarnar?
Aðalsmerki og helsti styrkur Boot Camp er að engar tvær æfingar eru eins. Fjölbreytileikinn hindrar stöðnun og tryggir þér betra alhliða form en almennt þekkist í líkamsrækt. Þú veist því aldrei hvað framundan er á hverri æfingu og það er einmitt ástæðan fyrir því hversu margir stunda Boot Camp allan ársins hring; óvissan er spennandi þáttur. Þú getur þó fullvissað þig um að hver tími skilar þér þreytu, ánægju og árangri.

Hversu oft eru æfingar?
Hver hópur mætir þrisvar sinnum í viku (nema Grænjaxlar og Junior sem æfa tvisvar sinnum vikulega) og varir hver æfing í klukkustund. Teygjur fara fram að æfingu lokinni þar sem allur klukkutíminn er nýttur að fullu í æfinguna. Fyrir utan hefðbundnu tímana eru í boði sérstakar aukaæfingar í annarri hverri viku sem eru tveggja tíma langar og haldnar utandyra. Einnig eru starfræktir hinir ýmsu hópar innan Boot Camp sem hittast vikulega á aukaæfingum s.s. hlaupa-, hjóla- og sundhópur og fótbolta- og körfuboltahópur. Þess að auki er í boði æfingaraðstaða í húsnæði okkar með lóðum, styrktartækjum og þrektækjum. Hver og einn getur því fengið alla sína líkamsþjálfun hjá okkur, sama hversu fjölbreytt eða mikil hún er.

Hvernig árangri nær fólk í Boot Camp?
Árangur fólks er eins misjafn og þau markmið sem það setur sér. Sumir leitast eftir að létta sig á meðan aðrir vilja bæta kílóum á sig. Aðrir koma hingað með önnur markmið s.s. að auka þol sitt, fá meiri orku og þrótt, íþróttamenn sem vilja bæta sig í ákveðinni grein og fólk sem sækist eftir auknum styrk. Sameiginlegt með öllum þeim sem eru tilbúnir að leggja sig fram á námskeiðinu er að fituprósentan lækkar, það finnur mikinn mun á þoli, styrk, þreki og hreyfanleika. Auk líkamlegs ávinnings muntu finna fyrir auknu sjálfstrausti, meiri sjálfsaga og þú kynnist nýju fólki sem gaman er að æfa með.

Ég á við meiðsli að stríða svo ég held að ég geti ekki gert allt. Get ég þá ómögulega æft Boot Camp?
Alls ekki. Þjálfarar okkar eru þjálfaðir í að aðlaga æfingaáætlunina að sérstökum aðstæðum. Ef þú getur ekki gert eitthvað á æfingum mun þjálfarinn leiðbeina þér með aðrar æfingar til að styrkja þig þar til þú treystir þér að reyna við ákveðnar æfingar. Mundu þó að láta þjálfarana sem sjá um tímann ávallt vita af meiðslum þínum svo hægt sé að vinna með þeim en ekki gegn þeim.

Hvað gerir Boot Camp svona sérstakt?
Boot Camp er algjörlega sérstök þjálfunaraðferð sem á enga sína líka. Allir þjálfarar hafa sótt sérstakt þjálfaranámskeið hjá Boot Camp og þú munt finna fyrir miklum mun þegar þú mætir á æfingu hjá okkur. Þjálfarar okkar hafa allir mikinn metnað í að koma þér í þitt besta form og eru tilbúnir að leggja sig alla fram til að hjálpa þér við að ná þínu markmiði. Þúsundir Íslendinga geta vottað til um árangurinn sem næst í Boot Camp. Komdu í prufutíma og prófaðu sjálf/ur!

Hvað þarf ég að koma með mér í tímana?
Það eina sem þú þarft með þér á æfingar er þægilegur æfingafatnaður og góðir æfingaskór. Gerðu þó ráð fyrir því að hluti æfingarinnar fari mögulega fram utandyra svo viðeigandi hlífðarfatnaður er góð viðbót. Á útiæfingum skaltu ávallt klæðast eftir veðri og er betra að vera of mikið klæddur en of lítið. Þegar þú byrjar á námskeiði færðu Boot Camp vatnsbrúsa til að nota á æfingum. Annars þarf bara jákvætt hugarfar og sterkan vilja til að ná árangri og njóta æfinganna.

Mig langar að byrja strax en næsta námskeið byrjar ekki strax. Þarf ég að bíða eftir því?
Alls ekki! Þó svo að ný námskeið byrji eingöngu á 6 vikna fresti er hægt að byrja í Boot Camp hvenær sem er. Þjálfarar taka ávallt vel á móti nýliðum. Hafðu samband við okkur til að fá nánari upplýsingar.

Mig langar að koma í prufutíma. Þarf ég að skrá mig sérstaklega til þess?
Já. Það er eingöngu vegna þess að svo margir tímar eru iðulega fullbókaðir. Hafðu bara samband við okkur á Þetta tölvupóstfang er varið gegn ruslpóstsþjörkum, Þú verður að hafa JavaScript virkt til að sjá það. og við bókum þig í tíma hið fyrsta.