Loka
Skráðu inn notendaupplýsingar þínar hér til að komast inn í BIS
Hvað er Boot Camp?
Uppruninn
Boot Camp er sérþróuð æfingaraðferð sem byggist á æfingum og þekkingu þeirra Arnalds Birgis Konráðssonar og Róberts Traustasonar sem upphaflega mótuðu kerfið. Grunnurinn að Boot Camp þjálfunaraðferðinni kom til þegar Arnaldur Birgir sótti lífvarðanámskeið í Bretlandi og Suður-Afríku. Námskeiðin voru kennd af sérsveitarmönnum og þegar Birgir sneri heim nýtti hann sér reynslu sína af þeirri ströngu líkamsþjálfun sem hann upplifði þar og þeim mikla aga sem réði ríkjum. Hann hóf þegar að breyta áherslum sínum sem einkaþjálfari og á sama tíma kom Róbert í þjálfun til hans. Fljótlega hófu þeir félagar að æfa saman og í æfingasalnum þróuðu þeir hugmyndafræðina og æfingaaðferðina sem er þekkt sem Boot Camp í dag.
Boot Camp aðferðin
Boot Camp er frábrugðin annarri líkamsrækt fyrir almenning. Boot Camp eru hópatímar þar sem þjálfarar keppast við að ná sem mestu úr hverjum og einum á hverri æfingu. Meðlimir æfa 2-3 sinnum í viku með sínum hóp og mæta auk þess aukalega með öðrum hópum í annarri hverri viku á sérstaka tveggja tíma útiæfingu. Þetta fyrirkomulag hefur sýnt sig og sannað á þeim þúsundum sem hafa æft Boot Camp að það hentar fullkomnlega eitt og sér sem alhliða líkamsrækt en einnig æfa margir aðrar íþróttagreinar samhliða þessum æfingum.
Æfingarnar byggjast á því að hver og einn leggi sig 100% fram burtséð frá líkamlegu standi. Þegar allt kemur til alls er það hugurinn sem hjálpar þér þegar orka líkamins virðist á þrotum og með því að þjálfa hann samhliða líkamlegri getu færir þú mörk þín sífellt lengra og kemst í betra andlegt og líkamlegt form. Á hverjum degi uppgötvar fólk í Boot Camp að það getur mun meira en það bjóst við og jafnvel meira en aðilinn sem þeir töldu að væru sér fremri er líkamlega burði varðar. Það eru þessir sigrar sem skipta svo miklu máli og hjálpa fólki að komast á næsta stig.
Allir þjálfarar Boot Camp hafa klárað sérstakt þjálfaranámskeið Boot Camp sem byggir á þeim kröfum sem Boot Camp gerir til allra þjálfara sinna; að þeir hafi sjálfir upplifað æfingarnar og meira til. Þjálfararnir læra því fljótt á mörk hvers og skiptir þá engu máli í hvernig formi fólk er. Hver og einn kemur hingað með því markmiði að fá sem mest út úr hverri æfingu og með ákveðnum en jákvæðum hvatningum þjálfara er öruggt að allir fara þreyttir en ánægðir út. Þjálfararnir leita sífellt nýrra leiða og takmarka við æfingar og þjálfun og beita einfaldri rökhugsun þegar kemur að því; ef það virkar, þá er það notað! Það er því þessi einstaka blanda úr ólíkum æfingakerfum og þær fjölbreyttu áherslur sem tryggja því að tímarnir séu skemmtilegir á sama tíma og þeir skila árangri.
Sérstaðan
Með tilkomu Boot Camp varð vakning í líkamsræktargeiranum á Íslandi. Í áraraðir höfðu Íslendingar sótt í stóra tækjasali og æft þar á hlaupabrettum og í hinum ýmsu vélum. Boot Camp vakti aftur upp áhugann á því að þjálfa á einfaldan og árangursríkan hátt og fólk áttaði sig á því að það er hægt að hafa gaman af því að æfa. Í kjölfarið reyndu margir að leika sama leik og jafnvel nýta sér nafn Boot Camp sem var þá þegar orðið þekkt. Boot Camp hefur þó ávallt haldið sérstöðu sinni þar sem ekki er hægt að leika eftir þann góða anda, metnað og kröfur sem Boot Camp gerir til þjálfara og iðkenda sinna. Það er aðeins til eitt Boot Camp!